喺教院聆訊代表羅范嘅資深大律師莫樹聯，出親場都着套條子西裝打晒呔，形象斯文又夠sharp，原來佢同無綫播緊嘅《最緊要健康》嗰位靚仔醫生主持莫樹錦係親兄弟。呢對兄弟近日頻頻曝光，據講細佬莫醫生有唔少OL同師奶fans，每次出鏡都官仔骨骨，頭髮梳到有個「尖啄」喺額頭中間，達到「一條都不能亂」嘅境界。
阿哥莫大狀閒時鍾意睇畫展，又識得彈琴，佢同八方講，同細佬感情好好。莫醫生專長腫瘤科，曾經醫過一代鬼才黃霑，佢閒時亦會寫吓文章，出過本書叫《醫生會哭》，笑言自己專攻肺癌科，所以係「肺」人，認真風趣。莫醫生話冇乜留意教院風波新聞，但相信阿哥表現好smart。