正所謂少女情懷就總是詩，可能正正因為咁，G.E.M.（鄧紫棋）同林宥嘉分手之後，仍然喺微博隔空開火。吖，應該講話似乎係留言想對方睇到咁啦。

林宥嘉同台灣前女歌手丁文琪嘅新戀情，0依家都浮到好面吓喇，前晚林宥嘉喺台北嘅演唱會，丁文琪仲高調蒲頭，之後仲喺微博貼張相片，暗示話永遠支持林宥嘉。

喂，唔使呀嘛！舊愛同人哋咁sweet，G.E.M.繼噚日喺微博貼咗張收到玫瑰花相外，今日凌晨再次出擊，喺微博貼相留言，今次張相就得半個已經裂開咗嘅心，上面仲有「YouCompleteMe」字樣，唔知係咪暗示戀情俱往矣，往事就唔好擰返轉頭呢？

G.E.M.嘅留言都字字咬出有血咁，佢大拋幸福論：「幸福不是遇到一個能包容你的任性的人，而是遇到那個讓你不想再任性的人；幸福不是擁有著你珍惜的，而是被珍惜你的所擁有著；幸福不是對方能完全給予，而是你願意為對方完全奉獻。」而G.E.M.好姊妹何超蓮都留言讚：「好文采阿！！！讚」

不如算啦，日日咁一人寫幾句把鬼咩，各自繼續開心又快樂咁生活落去啦，舊屎，對唔住，舊「時」沖咗去廁所罷啦！