理工大學為爭取國際排名，今年起規定所有教學人員都要做研究，連講師都要交「功課」，如果交唔夠paper，可能喺六年內被叮走。好多平時只教學，少做research嘅講師擔心飯碗不保，有人陰謀論，質疑新政針對立法會議員張超雄。
理大高層早排同教職員協會去東莞retreat時討論呢個政策，據講有教職員好勞氣，指出好多講師喺理工未升格做大學時同學校一齊捱，如今理大升格薄有名氣，高層就打完齋唔要和尚，有人更直指老校潘宗光十足現代陳世美，始亂終棄拋棄糟糠，潘宗光聽到面都黑晒。理大發言人就話，教員交幾多paper由學系決定，暗示「劊子手」係學系阿頭，唔係老校，又指張超雄屬舊制員工，唔受新政策影響。