貝安琪(Ankie)今年2月喺德國未婚產子，男友Simon陪伴在側，轉眼間囝囝Sebastian已經8個月大，呢位新手媽媽亦已返港重投工作搵奶粉錢，回歸第一擊係簽約好友Mandy Lieu旗下，新人事新作風，貝安琪就話自己都想有新嘗試，希望可以拍吓電視劇同電影(新聞連結： http://bit.ly/2xP1o0Z )

難得唔使開工，噚日5時許，Ankie就拖住囝囝去中環Shopping，呢位新手媽媽都真好勁吓，獨自一個人拖住BB車同囝囝行街街，其間佢哋兩母子就入咗一間內衣店，當女人見到「獵物」就梗係雙眼發光㗎啦，而Ankie都唔例外，而未夠一歲嘅Sebastian都好乖豬，坐喺BB車上面等媽媽。Ankie隨手咁攞咗幾款保守嘅「爸爸」拼上身，唔知係咪着開呢個品牌嘅「爸爸」呢，Ankie就唔使試身都有斬獲，即刻埋單。

俾錢嘅時候，Ankie就抱起BB，而售貨員見到Sebastian咁得意，都忍唔住撩佢玩，逗得Sebastian係咁笑，O氹得啲姐姐鬼咁開心㖭！之後Ankie離開，拖住囝囝步行往置地東方文華酒店，等候升降機其間，Ankie就蹲低身，睇吓囝囝，當然要錫吓乖仔啦，真係好Sweet㗎！

《蘋果》就致電Ankie，問到佢帶埋8個月大囝囝去內衣店買內衣，轉攻較為保守嘅款式，佢就笑言：「我噚(前)日都有嚟買，有買性感嘅喱士款式，今(噚)日就嚟換啲nude color嘅款，係買嚟工作打底用，同埋要換返大size，唔知點解生完BB後咁耐，個cup size依然係大咗一個碼。」

問佢點解帶埋囝囝去買內衣，佢就話鍾意自己湊，鍾意帶住囝囝出街：「佢好奇好鍾意出街，o依家8個月大，識好多嘢，識give me five，叫爸爸媽媽，想去見多啲人唔怕羞，佢好搞笑好為食，成日望住我，好想食我嘅食物，搞到我要戒辣。」

雖然囝囝只有八個月大，但Ankie已有少少怪獸媽咪Feel，幫囝囝搵咗幼稚園：「我o依家會同佢玩Puzzle、畫畫。嚟緊佢要學英文同普通話，我o依家同佢講德文，佢爹哋同佢講法文，佢聰明過我，四語應該OK。」因為要湊B，Ankie就話工作盡量會留喺香港，就算外出工作都會帶埋囝囝，更笑言如果有人想搵佢母子檔工作，如果唔太辛苦，佢都會考慮。

講到有仔萬事足，問到佢幾時再追多一個小朋友，佢就話好多醫生都話生完第一胎，營養會流失，最好要14個月後再生。至於幾時補搞婚禮，Ankie就話出年：「會喺外國搞，再返香港搞，朋友o依家提議好多唔同地方，未婚夫又想喺美國，都未揸定注意。」