鍾欣潼（阿嬌）同衛詩雅今日現身金鐘出席服裝品牌活動，着藍色大V領裝上陣嘅阿嬌，雖然身材冇乜睇頭，但人逢喜事精神爽，問阿嬌係咪靚咗？佢笑住話：「嚟緊要返內地拍電影，唔關結婚事，我咁懶都日日做面膜，因為當地好乾，要養足精神去拍，要去個幾月。」

問阿嬌知唔知未婚夫賴弘國會唔會去探班？佢就話未知，仲話對方都好忙。

講到籌備結婚進展，阿嬌笑笑口話：「見過家長，其他嘢未plan。」至於家長嘅評語，佢話：「對我好好，咁我本身都係善良嘅人嚟嘅！」

阿嬌話男方家長未有催佢生B，笑問佢知唔知會唔會送金豬俾佢？阿嬌即刻話：「我已經叫咗公司珠寶店同事，話如果我阿媽去買（金豬），唔好攞俾佢，因為我唔想戴。」

咁如果奶奶送俾你？阿嬌即刻話：「佢未必會送金器，或者會送傳家之寶之類。」阿嬌又話唔戴金豬可以戴珍珠，又話自己會生B，但係咪明年生豬B，就話要睇緣份同時間，又話壓力都好難講，順其自然。

阿嬌又話婚後會兩頭住家，會喺台灣築愛巢，但婚期未定。有指佢工作咁忙，邊有時間結婚？阿嬌反問：「唔結得婚㗎咩？我係勤勞藝人，結婚都會工作，時間自己分配。」不過，佢話未諗到去邊影結婚相，話自己怕熱又怕凍，而最緊要嘅係「減咗肥先！」

提到好姊妹容祖兒同劉浩龍分手，阿嬌就話：「最緊要佢開心，佢願意講就講，我哋唔會八卦，我哋係知心朋友。」

另外，衛詩雅就話過幾日會去亞洲滑浪度假：「今次一個人去，呢個假期等咗年幾，之前一個旅程因為工作，買晒機票同book好酒店都要取消。」佢又話今次自己去，會去東南亞一啲安全又溝通到嘅地方。問佢怕唔怕俾人屈錢？佢笑住話：「唔會屈到我，因為我冇錢，同埋我都請咗教練。」衛詩雅又話佢滑浪會着得密實，因為有朋友試過着三點式，一個浪衝埋嚟變咗無上裝。

精選娛聞，喺晒《娛果》
http://fb.com/appledailyent