已故香港建設創辦人于鏡波個女于文鳳同周星馳雖然都分咗手成7年，但佢兩個依然仲有轇轕，因為女方仲同男方打緊官司，由2012年入稟高等法院，向星爺及佢旗下嘅星揚海外公司，追討8,000萬元售樓佣金，單官司仲未完結。咁于文鳳近況如何呢？日前大約4點幾，《蘋果》記者喺利園商場撞見佢，當時佢身邊帶住3至4歲大嘅小女孩，仲有一位女外傭同洋男保鑣陪住行街，佢哋一行人去童裝店買嘢，睇得出于文鳳都幾錫呢個妹妹。

小妹妹兩度要求去廁所，于文鳳都親自帶佢入廁所，出嚟時見到廁所門口，有個檔口賣蛋糕，小妹妹忍唔住想買嚟食，但揀咗一輪又冇買，見到佢同小妹妹全程以英文溝通。後來行下又有一位中年黑衫男子拎住一袋二袋會合佢地，行咗一輪，于文鳳首先送小妹妹、女傭同洋男保鏢上了一架benz離開，而佢就同黑衣男上咗一部7人車離開。

好啦！到底小妹妹同佢係乜關係？佢同黑衣男係咪拖友？當然最直接係問番于文鳳本人啦！佢接受電話訪問話：「小妹妹係我個姪女，黑衣者係我朋友嘅朋友，我已經有男朋友，佢係Andrew Liu（廖創興銀行主席廖烈文的長子廖堯城）。」

問佢同廖堯城幾時拉埋天窗？同星爺單官司係未仲打緊？佢話：「單官司一直進行中，至於我感情嘅嘢，我向來低調，今日已經答咗你哋好多嘢啦！」雖然于文鳳對感情事好低調，但聽聞佢同廖堯城感情仲好好，事業方面佢都有同人合作搞啲生意做下，個男友係銀行家，應該會有好多投資心得傳授俾佢。