3年前熱捲全球嘅「冰桶挑戰」善事，成功令各地關注肌肉萎縮性側索硬化症，當年唔少藝人明星包括劉德華、容祖兒都響應接受挑戰。(新聞連結： http://bit.ly/2fgV1sE )

日前，前財爺曾俊華喺facebook就貼咗條短片，片中佢同森美蒙住雙眼，接受「雪糕挑戰」(Ice-Cream Challenge)。短片中，鬍鬚曾同森美要喺1分鐘之內互餵對方食雪榚。由於大家都係睇唔到嘢嘅關係，搞到鬍鬚曾同森美成面雪糕，可見蒙住眼餵對方，並非易事。(新聞連結： http://bit.ly/2y1eUzE )而雪糕挑戰，係由《導盲．Guide Dog》發起，目的係為導盲犬籌款。

之後，鬍鬚曾就點名邀請自由黨榮譽主席田北俊接受挑戰，而田北俊日前就搵嚟細佬田北辰「找數」，食到花面貓嘅田少，喺搵人接受挑戰時，就點名叫陀住四個月BB嘅劉鑾雄太太甘比，以及細細個已經睇住佢大嘅張寶華，接受挑戰。今日，自嘲唔再Simple，亦唔再Naive嘅張寶華，唔使兩日，就已經喺facebook貼咗短片。

片中佢搵咗好友黎芷珊同佢一齊找數。雖然食得比上面班男士斯文，不過芷珊姐姐同張寶華都講笑話一分鐘內，食咗幾個月嘅quota。