反修例運動遍地開花，矛頭開始指向支持送中惡法嘅建制派，原定今日舉行嘅民建聯周年會慶酒會取消。民建聯昨日傍晚發聲明，話鑑於近期社會氣氛以及不時出現衝突亂象，為免出席嘉賓不便及存有安全風險，亦唔希望發生突發事件而危害途人安全等，中央委員會決定取消呢次會慶酒會，唔知算唔算網民又再贏一仗？

「城主」易拉架　搣走新民黨徽

除咗唔敢搞酒會，亦有建制派區議員落區收埋自己個黨徽唔敢見光，有沙田第一城街坊發現，該區區議員、有「城主」之稱嘅黃嘉榮，噚日放置新嘅宣傳易拉架，竟冇咗新民黨標誌，唔通佢已經退咗黨？八方向黃嘉榮了解，佢話易拉架唔係自己設計，或者負責同事評估過，「可能咁controversial，不如唔好落」喎。黃又自言「食得鹹魚抵得渴」，若無新民黨，佢都做唔到咁耐議員，就算有街坊因為反修例運動，走嚟質問佢新民黨嘅立場，佢都係話唔會退黨。據知傳媒出身、27歲嘅公民黨黃文萱，有意喺第一城出戰，有可能會同黃嘉榮決戰；而黃嘉榮被問到擔唔擔心區選選情受修例事件影響，佢就話冇得驚，相信街坊分得清政治同民生工作，似乎唔怕新丁挑機。