黎諾懿今日到灣仔出席美容品牌頒獎禮，最近被網民力推成「港普教父」的他說：「其實有啲唔好意思，我講到咁仲好似好光榮，小朋友真係唔好學，要畀心機讀書。」

他被提議再下一城唱國語歌，黎諾懿說：「我本身唱歌已經好猛料，其實經理人都有提議嘅，始終去內地登台，唱國語歌會好啲。不過我要成首歌唔走音，已經係好高深嘅學問，如果仲要唱國語，無謂獻醜啦，費事越搞越大啦。」

問到黎諾懿會否因為普通話不標準，少了到大陸工作的機會？他坦言會少了機會登台：「我之前做《舞動奇蹟》，喺湖南電視台有班朋友，佢哋都話真人騷搵唔到我，嗰啲《爸爸去哪兒》嗰啲，驚觀眾聽唔明。其實我睇微博，大家都話聽得明呀，拍劇有配音又有字幕㗎嘛。」

黎諾懿又自爆兩歲囝囝的英文都比他好：「佢而家同姐姐（傭人）講嘢講全句㗎嘛，我都問『佢講咩呀？』，真係好深㗎。我諗住第二時佢學英文同國語，我就陪佢上堂囉，我家長嚟㗎嘛，陪佢順便學埋，因為兩個人上堂貴啲。」他笑指不擔心囝囝用英文講他壞話：「小朋友唔係儍嘅，佢都要問我攞錢㗎。佢第時大個要買嘢、識女仔㗎嘛，媽咪多數嚴啲，我冇乜時間陪佢，決定用金錢同物質，離間佢同媽咪嘅感情。」

------------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
--------------------------------
【記住63836568】全民爆相爆片！下一個爆料王就係你
https://bit.ly/2Guolu9