今期賽事，大家可能都相繼感染「選擇困難症」，多場三、四班1200、1400米賽揀得上手的馬不多，學桂神話齋，一係熱，一係冷（暴冷暴熱）。

第二場五班1400米：14駒中只得「紅駿之星」、「齊齊健康」及「駿馬翹楚」識贏，前兩駒贏五班，這次重磅、外檔，條件被削弱。

「駿馬翹楚」季內贏四班同程1400米，加分後不斷轉場地、路程，試過想再搏，確認唔夠跑後，便索性求減分，上仗落五班跑谷草1200米，也非強項，加上排外檔，結果跑到氣管多血，休息九日復課，自三月恢復快跳，無試大閘，卻有拍跳、草地課期，雖覺觀感不及季初，但唞夠卻配合其馬性，還在五班跑首本路程，對手唔強，排四檔亦好跑，博佢返嚟！

同場「紅駿之星」勝在銳開，仍可再揀；「齊齊健康」外檔影響大。「幸運坊」上次輸在快步速跟得太急，這次回配杜利萊，排一檔，仍可再爭。「急急腳」用莫雷拉，縱排外檔都會預埋，這次落班即報強項，可博見真章。「但求上舖」近期嫌唔夠火。「喜威威」也不夠銳。「樂趣」唞近兩個月、體重跌、排外檔、除眼罩都是疑問。