跳完一輪勁舞後，當然要同觀眾交流吓，千嬅問到係咪你哋預期之中想睇到嘅，有冇？現場觀眾就話：「跳舞好勁」，千嬅笑說：「咁我出年係咪要轉工呀？我跳舞跳得咁勁，咁我要同Sunny Wong度吓喇喎，多謝大家完成我呢個夢想，我想做三面台好耐，因為演唱會同隊band同Chorus都係一齊合唱，雖然我企喺前面，但係其實我都喺裏面嘅一份子，有一份安全感，今日係緣份令到大家可以合作，有新知舊遇，喺我22對生日之前做到係好開心！」現場歌迷即大笑，千嬅就話：「呢啲冇需要呃人，一查就知啦！我一直都好想做跨年騷，有好大嘅感觸，一個人成長已經係倒數，同時間比賽，每一年都有意義，會同自己講做好啲，對自己同身邊嘅人好啲，所以做一個跨年嘅騷係一個好有意義嘅事，可能早幾年做我都未有透徹嘅想法，我係想自己嘅嘢分享，鼓勵之餘，將個『勇』再Share俾大家，希望2018年裏面，大家可以做得更好，更加努力，結果係一個鼓勵，但最重要係一個過程，我今晚好享受你哋嘅歡呼聲，每一盞嘅燈光閃住我嘅時候，係一個好好嘅收穫，好喇，我都開始激動喇，唔好再講，因為我知道自己會有一個好龐大嘅失落感，好大件事，你哋越叫我唔喊呢，係咪想叫我喊呢？」

現場觀眾即叫佢喊出嚟，千嬅就話：「我做乜要喊出嚟呢，我做咩o依家要喊出嚟呢，有乜理由喊出嚟，不如你出嚟摑我一巴啦，你哋係咪好鍾意同我傾計呀？」觀眾大叫：「係呀！」千嬅就話：「咁使乜買飛入嚟，上facebook咪得囉！」之後觀眾話佢好funny，千嬅就話你哋當我諧星呀：「不過我都係諧星出身，之後不如拍套《我的生存之道》，由出世拍到去桃姐。」佢就係咁大笑話好似拍鬼片咁...「我都唔知講邊度，都係唱歌喇！」接住就唱《飛女正傳》。

更多娛聞，喺晒《娛果》
http://fb.com/appledailyent