跳舞女子組合FFx喺2015年以《SugarBaby》震驚網絡，喺香港娛圈殺出條算路，嚟到2016年佢哋又有咩計劃呢？今日佢哋喺深水埗出席「平等參與活動嘉年華會」，佢哋就話下一個目標就係衝出香港。

FFx喺活動中又唱又跳，仲向市民派親筆簽名相同握手，人氣似乎ok咁噃！佢哋仲透露農曆新年喺車公廟求到兩枝上籤，籤文指佢哋會衝出香港，得到世界各地fans支持，點知真係實現咗，佢地話：「4月會去日本擔任一個跳舞唱歌比賽嘅表演嘉賓，同場仲有日本人氣歌手BabyM；另外我哋簽咗新公司，公司會安排排舞蹈師俾我哋，又會開戲同開舞台劇。」

問到日本方面係咪因為睇到《SugarBaby》MV先搵佢哋？FFx話：「唔係，因為之前我哋做過呢個比賽嘅香港站表演嘉賓，所以今次去埋日本。」日本啲組合百花齊放，出晒名燕瘦環肥加騎呢樣樣齊，而且正如燦神話齋「百貨應百客」，FFx能夠殺出血路一啲都唔奇！