「女長毛」雷玉蓮趁今日驚蟄，下畫攞住印有特首梁振英同政務司司長林鄭月娥嘜頭嘅「特區三人組」肖像，去咗銅鑼灣搵阿婆「打小人」。

蓮姐話，去到鵝頸橋時，人頭湧湧，唔少阿婆一見到梁振英同林鄭個樣，已即時嚇窒咗，唔敢接單，話「我哋唔打呢啲，一打咗好危險」。蓮姐問佢哋口中所講「危險」係乜時，佢哋又答唔出，最終蓮姐喺鵝頸橋四圍走，搞足成粒鐘，問咗四、五檔阿婆後，終於搵到阿婆夠膽接單，用咗130元成功喺鵝頸橋打梁振英同林鄭小人，佢話其間吸引大批市民圍觀，有市民更支持話「畀五百元都抵打啦」，睇嚟現時真係民怨沸騰喎。