昨日港股延續牛皮上落的局面，較為有亮點的算是內房股，主要是繼續有投資者憧憬內地會放水，不過，筆者認為中央仍受當年投放4萬億元人民幣的後遺症困擾，政策難以大變，同時中央亦講明，明年房地產仍是重點調控範圍，所以炒內房股必須嚴控注碼及嚴守止蝕，記緊不要短炒變長揸。
當然，筆者亦相信會有政策微調，始終從內險股近日集資的行為，某程度上反映內地缺水的情況嚴重，市場過份乾涸，對企業以至整體經濟都唔係好事，所以調整存款準備金率是有需要的，只係筆者認為，每次政策調整的時間隔得越遠，對內地經濟的憂慮反而越低。
至於歐洲方面，局勢變化亦不大，最矚目的是月初歐洲央行宣佈由一年延長至三年的長期再融資操作（LTRO）正式啟動。歐央行公佈今次貸款共收到523間銀行申請，總金額高達4890億歐元，遠多於經濟師預期的2930億歐元，有人話歐洲銀行資金短缺的情況原來如此嚴重，不過其實連這批銀行都預計唔到歐債問題最終會發展成點，既然有平錢借，自然有冇需要都借定先啦。
歐央行的措施實際上已在行QE，只係形式上非買債而是向銀行注資而已，不過一日歐豬國家的還債能力未能令人釋疑，都會繼續成為攻擊藉口，自己就真係睇唔到班政客還有甚麼招數可出，所以亦繼續持有淡倉。當然，市場永遠是對的，若短期期指升穿18508，淡倉都會酌量減持，不過都只係減少少當走走位，等下一次機會加返。
張士佳
寶來證券（香港）資產管理部董事
本欄逢周一、三、五刊出