一手樓市○一年開始,扭轉開價較同區二手低水嘅局面,變為升水;舊年,重因為市場猛話供應會出現斷層,搞到一手樓價好似火箭咁飛升。美聯首席分析師劉嘉輝話,今年一二月,一手價高過二手嘅幅度,達到高峯,有四成二,係令近月買家紛紛轉投二手市場嘅原因。一二月開賣新盤唔多,主要係西環泓都與上水皇府山。
不過,大家唔使擔心一手價會進一步升水,因為今年可推售單位有兩萬幾個,比舊年一萬七千幾個多,發展商「嘜」價都唔敢太進取,以最近開售嘅將軍澳豪庭為例,只係比同區二手價高一成幾。
劉嘉輝預計,一二手樓價差幅逐步收窄至三成以下。但佢強調,唔代表一手樓價會下跌,只係發展商「嘜」價冇咁高啫。因為一手價唔會大升,咁二手都係只會平穩發展。
山頂樓估值七億七
卓先雷偉全估計,勾地表二十七幅住宅地皮,可建一萬二千一百三十八個單位,值四百一十四億。
估計基礎係:中小型住宅每個六百五十呎、中型千呎,豪宅二千呎。除西半山波老道,其他幾幅豪宅地皮只可起幾十個單位。
好似山頂樓,估值七億六千八百萬,呎價萬八,但若以只建二十一伙計,每戶三千六百幾萬,加埋建費同利息,總成本就更高,賣價要幾高可想而知。其他幾幅豪宅地皮,情形都係咁上下。