荷李活影星韋史密夫（Will Smith）、祖爾艾哲頓（Joel Edgerton）、露美慧柏絲（Noomi Rapace）、導演大衞艾亞（David Ayer)、監製Eric Newman及Bryan Unkeless一同到日本宣傳Netflix新片《光靈》（Bright)，大隊今日齊齊出席記者會，於台上接受訪問。

一開始韋史密夫已非常興奮，第一條問題就衝落台攞咪俾記者。被問到同祖爾艾哲頓於戲中嘅合作，佢話：「我哋嘅化學作用就好似啲荷李活浪漫愛情片咁，佢一化妝（變成獸人），我個心就囉囉攣。」之後露美就插嘴話：「但一落妝就咩都冇晒。」引起全場大笑。當又有記者問到佢同李安拍緊嘅新戲《Gemini Man》，韋史密夫話自己現階段唔敢講咁多，因爲怕俾人炒：「佢用緊全新嘅攝影機，想帶俾觀眾只有在戲院先感受到嘅體驗，戲中我會一人分飾兩角。我哋已經拍咗6個月，預計下年先拍完。」仲大讚李安好敢試新嘢。

另外，於戲中有大量動作戲嘅露美亦話今次絕對考起佢：「我平時會利用角色嘅缺陷，但今次演精靈，佢動作要好似水咁流暢，加上佢對白唔多，要好多練習先得，我幾乎要攞住把刀陪我瞓！」最後執導過《自殺特攻：超能暴隊》（Suicide Squad）嘅大衞艾亞都有提起舊作：「我嗰次學咗好多嘢，電腦技術、化妝等等，可以應用喺今次度。」佢仲話今次電影公司俾好大自由度佢任佢創作，無論錢定資源都好豐富，所以希望大家會鍾意。

當訪問環節結束時，大會安排眾星拿起日本燈籠拍照，向來冇乜架子嘅韋史密夫竟親自搬枱凳，十分搞笑。

更多娛聞，喺晒《娛果》
http://fb.com/appledailyent