傅穎（Theresa）今日去到觀塘apm為「apm五月品味法式藝術節」擔任嘉賓，喺現場介紹法國嘅藝術品同產品。Theresa今日主動話要澄清佢早前被指被富婆郭妮包養嘅報道，Theresa話:「有報道話我畀一個年約40歲嘅國產富婆包養，其實佢係我公司一個partner（合作伙伴），我邊有咁好命，再咁寫我就嫁唔出嘞！單新聞真係好搞笑。」Theresa話o依家有穩定男友，但係未係適當時候公開，暫時以工作為先，遲啲慢慢先公開，想大家着眼佢嘅工作，唔想將焦點放喺佢嘅戀情上，所以難怪佢男友仍處於「隱形」狀態。Theresa補充，話同男友拍拖一段時間，自己每次拍拖都係以結婚為前提。

問到Theresa佢位「隱形」男友有咩反應?佢話:「佢覺得好笑囉！」Theresa又話:「個女仔細個我，被人寫40歲好慘。」Theresa指個女仔叫Andi今日都在場，二人仲應邀合照，佢哋係合作製作公司嘅伙伴，Theresa話嚟緊其公司會趁暑假推出寫真、書籍及公仔等。

之前Theresa貼咗張佢戴住婚戒嘅相上網，佢解釋其實係道具嚟，嗰隻係假戒指，對於恨唔恨嫁，Theresa話:「冇話恨唔恨，身邊個個都成長晒，自己仲係少女心。」至於想幾時結婚？Theresa話:「我想35歲，o依家仲有幾年，男友同我差唔多大，自己嘅朋友都認識佢，o依家拍拖冇以前咁多顧忌。」

昔日Cookies隊友Miki（楊愛謹）日前出嫁，Theresa話雖然冇接到Miki嘅邀請出席婚禮，但亦有恭喜對方，Theresa話:「嚟緊會有齣戲合作一齊拍，有同佢聯絡恭喜佢。」被指Miki結婚當日，Theresapost健身相示威，佢話絕對唔係大家所想嘅示威。