電盈（008）主席李澤楷（小小超）係超人李嘉誠細仔，自少萬千寵愛在一身，從來應該只有佢鬧人，冇乜人敢話佢，噚日喺股東會上竟然就有一位女股東係咁指住佢嚟鬧，小小超都算係咁喇，竟然冇乜點黑面，仲親自解釋咗一陣，換轉第二位太子爺，可能都費事理佢！
老實講，呢位女股東所鬧嘅嘢其實冇乜道理，佢主要係翻舊賬，指電盈喺2003年將股票五合一，話「我當日買1,000股，點解食咗我800股」咁話明係五合一，當然係得番200股。
小小超面對呢條令人O嘴嘅問題，仲要被人破口大罵，都冇即刻黑面或者叫身邊同事代答，來來回回自己答咗兩次。佢叫小股東計算全部回報時，應該計埋咁多年收嘅股息，仲有就係「股票高同低，係自己喺唔同時間，作出嘅投資決定。」賺咗蝕咗，都應該遵守自由市場規則，講明「公司係唔會對你有任何賠償。」

呢位女股東應該好唔滿意小小超呢個答案，開始企起身大吵大鬧，話要繼續問，喺呢個時候，小小超終於有些少怒火咁話，「我已經聽到你問題！」然後就比較寸嘴咁話「我諗你要有基本經濟常識先」，續指五合一係經股東批准，如果有疑問可以去搵律師，跟住就宣佈股東會結束了，現場隨即噓聲四起，噓邊個就唔知道嘞。

電盈（008）忠實小股東陳仲翔每年出席電盈股東會，都唔會令人失望，總有出位提問或者發言，噚日佢話自己打算自訂一個叫做「N0WTV」嘅車牌，仲準備好5,000蚊，希望以底價買到，然後就畀電盈旗下now TV作為宣傳推廣之用，佢直接問主席李澤楷到時會唔會畀番錢佢喎。
李澤楷見慣不怪，好認真咁答佢，指買車牌呢件事要由now TV嘅管理層決定，要等佢哋決定值唔值得使呢筆錢，佢就唔會幫管理層做呢個決定咁話。
咁又啱喎，一萬幾千對李澤楷當然濕濕碎，最緊要係用得其所，如果佢覺得有需要，等到呢個車牌拎出嚟拍賣嗰日，佢搵人去拍都得喇，又使乜麻煩陳先生呢？

李華華
mailto:[email protected]