當年今日

香港女子網球挑戰賽花絮

蘋果日報 2002/01/05 00:00


卡姐簽名有原則
香港人果然識貨,噚日卡佩雅蒂有個簽名會,就吸引到近二百位球迷排隊,向呢位世界二姐攞簽名,由於人數眾多,呢位美國球手好有原則堅持一人只可簽一次,就算球迷一次過帶齊畫冊、T-SHIRT及大型網球攞簽名,最後都只得一個咁大把,難怪有人即場以二百蚊收購。

啤酒女郎滿場飛
相比起前兩日,噚晚維園網球場天氣明顯轉凉。天氣對於班球手,當然影響不大,反而場內賣雪糕雪條嘅小販,就傷亡慘重,成晚喺度等運到。之不過啤酒女郎,卻其門如市,原因好簡單,入場觀眾有唔少「鬼佬」,佢哋好似當水咁飲,啤酒唔好賣至出奇。

大專生兼職4日搵千元
Yuki同Karina兩位靚女,都係放緊新年假嚟嘉年華會廣場做兼職嘅大專生,工作主要幫一個攤位派朱古力同邀請球迷玩踩單車電子遊戲機,做四日就有一千元人工都唔錯。不過,Karina話最開心嘅,係見到咁多人排隊捧場喎。