上個禮拜六《師奶股神》播大結局，早喺《師奶股神》播映時，華華已經講過，有散戶喺網上討論區話，自從套劇開始做宣傳，港股就受詛咒，仲搵「丁蟹效應」嚟做比較，整咗個「天娥效應」。家吓最後一集，華華都要總結吓「天娥效應」嘅威力。
由齣劇5月26號首播，到上個禮拜五港股收市，恒指跌咗5.7%。將呢套劇同秋官「丁蟹效應」最勁嘅劇集相比，跌幅入到十大，排第六，僅次於《天地男兒》，難怪散戶都話怕咗娥姐嘅「天娥效應」。

半年後效應消失

套劇首播當日，恒指已經跌586點，到6月13日黑色星期五，更加低見22592點，跌幅6.4%，上周四晚套劇臨近埋尾，碰啱中央加油價，帶旺大陸股市，以為「輸家食尾糊」，唔使黑到尾，點知恒指跌勢喘定只係得半day，上周五午市再跌過。
不過，套劇播完，好多散戶都對嚟緊個市抱有希望，網友豬場喺網上討論區滿懷期待咁問：「唔知下星期會唔會嚟個後抽冲喜吓。」
事實上，華華做過統計，「秋官效應」過咗半年之後，對股市嘅影響就會減褪，好似經典嘅《大時代》咁，播完半年之後，個市升番兩成有凸。咁多套劇當中，只有《世紀之戰》例外。唔知《師奶股神》呢樣嘢又會唔會同「秋官效應」有得揮。