【騎師室小風波】安仔伸出橄欖枝 豐豐肯道歉即會被原諒！
蘋果日報 2019/12/29 11:00
道歉原諒田泰安史卓豐旌暉雄龍肢體接觸騎師室小風波
田泰安（右一）指史卓豐（左一）若肯道歉將可冰釋前嫌
Boxing Day（26日）谷草夜賽，史卓豐策「一舖成名」於1200至800米處幾次撞向居於右側丶由田泰安的「靚紫荊」，其中一次碰撞令到後駒一度失去平衡。
事後史卓豐被馬會裁定不恰當策騎判處停賽六日，將會錯過明年董事盃丶百週年紀念短途盃及經典一哩賽。
更嚴重嘅係，史卓豐之後於騎師室內對安仔有肢體接觸，被馬會罰款三萬元。
圈內有傳呢個肢體接觸唔係揮拳或起飛腳，但動機不良，針對安仔上半身，絕對有違體育精神。
究竟兩位當事人之後嘅關係會發展成點呢？安仔率先伸出橄欖枝，話豐豐肯向佢道歉的話，彼此之間就會冇嘢。
香港馬圈始終細，而且兩人住喺同一座騎師宿舍，大家係鄰居，出入時常碰面，亦冇人想見到佢哋面左左。
豐豐今期（29日）座騎牌面唔差，且看佢可唔可以盡快調整好心理，專心應戰。
力爭衞冕第七場洋紫荊短途錦標的「旌暉」同佢故劍重逢，人馬歷來合作取得三Win，默契有晒。
「旌暉」一向擅跑新鮮感，本身10月初於國慶盃入Q後，特別北上從化休息一個月，以培養新鮮感同儲體力，然後重投操揀。
第二場「雄龍」接連在谷草同泥地四班賽有良好追勢，計質素肯定唔係五班馬，如今初戰第五班有着數，可以幫到史卓豐今期贏馬。