電盈為開台打響頭炮，揀選八個女藝人參加旗下ViuTV嘅格鬥真人騷。雖然節目要到下年4月先出街，但幾個女仔嘅是非不斷。除咗Winkie黎美言(前Hotcha成員）俾晶女郎唐紫睿（Hazel)、鄧穎芝等人杯葛，Hazel更不滿Winkie真打，搞到塊面傷晒。

而最新加入戰團嘅，唔係女仔，而係龍小菌經理人邵子風，龍小菌都有份參加呢個節目，佢經理人早兩日就喺FB度炮轟：「白痴0靚模打MMA，簽晒生死狀比賽後，怪對手出手太狠，打花塊面，然後以此造新聞。」邵仲暗示話人矛嗰啲人喺比賽入面扯對手頭髮。俾邵子風鬧爆，Hazel喺WeChat就話冇回應！

至於喺比賽中做咗「獨孤精」嘅Winkie，噚日(28日)就喺微博留言：「做個堅強又內心善良的女人，是非擊敗不到我！」擺明挑機，唔知咁，會唔會引發新一輪罵戰！