酒逢知己千杯少，但如果酒後要駕駛，真係半杯都嫌多。劏房局長陳謬波飲酒飲出禍後，據聞成個官場都提高對酒嘅警覺性，私下話晏晝食飯要落「禁酒令」。噚日謬波同議員午膳，就滴酒不沾；新聞處噚日為傳媒搞嘅聚會上，亦都冇酒供應，唔通係怕成為「特別嘉賓」嘅狼英，酒後吐真言？

「咖喱餐」冇酒提供

近期官場及政界中人午間碰頭，幾乎都會笑笑口話：飲唔飲啤酒呀？然後就會接住話：好彩我有司機啫，擺明恥笑謬波酒後駕駛啦！有官場中人同八方講，查實政府官員對酒呢樣嘢一向高度戒備，過往都好少喺午間宴會上飲酒，以免酒醉後失態。
相比之下，紀律部隊高層似乎比較鍾意日光日白都飲酒，唔知係咪同佢哋個性豪邁有關？另一個鍾意日光日白都飲酒嘅政界中人，就係唐唐嘞，唔少同佢食過午飯嘅政界人士都話，對唐唐嚟講，一餐飯冇酒，點可以算係一餐飯呢？好在唐唐唔使自己揸車，飲幾醉都冇問題啦！
至於狼英呢，有人話佢酒量唔錯，始終喺大陸打滾過，點都頂到幾杯嘅，但噚日新聞處搞嘅傳媒聯誼「咖喱餐」，現場冇酒提供，唔通係驚狼英飲多兩杯後會盡訴心中情？新聞處強調一向慣例唔飲酒，唔係因為謬波出事先落禁酒令。謬波就好明顯知衰，噚日晏晝喺酒樓宴請議員時，並冇提供酒精飲品，據聞搞到唔少議員大失所望喎。
mailto:[email protected]