巴塞隆拿呢期真係勢不可擋,周三又贏一場,喺西班牙盃4強首回合主場迎戰維拉利爾以3:1贏波,各項賽事連贏十場。巴塞上一次十連勝已經係二〇一〇/一一球季,由哥迪奧拿領軍嘅時代;今次十連勝仲要幾乎場場大勝,十場勝仗有九場都至少入對手三球,單係美斯喺呢段期間已入咗十一球。美斯呢排狀態大勇,今季佢為巴塞已經貢獻咗三十四球再加十九次助攻。嗰邊英超有伊雲洛域疑似咬人病毒發作,呢邊「本尊」蘇亞雷斯(前)又似乎冇乜事,喺巴塞繼續生生性性。今場波美斯先開紀錄一球,就係嚟自阿蘇喺前場勤力搶到個波,再助攻畀美斯射入,佢今季喺巴塞嘅助攻次數,都已經達雙位數。