張家瑩、周嘉莉、秦啟維及徐丁，今日喺深水埗派米，宣傳亞視即將推出的內地劇《老米家的婚事》。張家瑩讚活動有心思：「米係中國人最重要食糧，希望香港人有飯開，安居樂業。」

早幾日喺銅鑼灣開咗間食肆嘅張家瑩話，活動後返鋪頭幫手，不過今日正值反佔中人士喺銅鑼灣搞遊行，佢擔心封路唔知點返鋪頭，不過佢又話：「好多商人朋友都支持，最緊要都係做個愛國愛港嘅商人，一日半日，如果對香港有用都支持。」

問佢係咪即係支持反佔中？張家瑩話如果唔係要出席派米活動，都會去參與。係咪認為佔中人士暴力而支持反佔中？佢話：「好多人問我去唔去，但係有活動，如果唔係我都去，當做運動。」乜遊行唔係表達訴求咩？點解變咗做運動？

張家瑩話香港地方好細，中環係商業中心，長期塞住會有問題，佢話：「我明白有部分人有自己意見，希望佢地做最好方法，唔好影響其他人。」但又強調自己唔係偏左、偏右，話自己係做娛樂，唔係政治家。

同場嘅周嘉莉表示，如果張家瑩去遊行佢都會去，仲話因為其他朋友都去晒，不過如果去又唔代表自己係反佔中，係因為社會好多不滿要面對....有冇人知道佢到底講咩？

問周嘉莉係咪覺得佔中人士暴力先支持遊行？佢就話自己冇政治立場，不過跟住就話：「最緊要溝通，冇理由唔鍾意就打人，我諗係誤會。」

咁如果覺得反佔中人士唔係暴力，點解仲要去遊行呢？周嘉莉話：「呢個遊行有好多唔同睇法。」


識睇，一定係睇足英台【英波Live】：

http://soccer.appledaily.com
http://bit.ly/engballlive