上季葉楚航開行副turbo,終於險勝告東尼初嘗冠軍滋味,之但係做完冠軍就要付出代價,馬匹評分飽和,需捱過一段青黃不接痛苦日子。早排葉楚航同相關馬主話,過完年就展開攻勢,之但係睇佢最近出馬陣容,未必會等到過年至發圍,尤其周三晚出馬九匹,係近期出馬最多一次。特別處係「明民天下」、「旅遊名牌」周日跑完又跑過,「確威龍」就係前個禮拜跑完,出得咁急你信唔信係貪得意。「明民天下」馬主想換馬,但隻馬有態,所以跑得就跑,響田草1400上名,谷草一哩絕對冇問題。「確威龍」上場排最外檔焗留後,直路掟出最外疊衝,竟只輸條頸俾「環保戰士」跑第四,難怪被加一分,今仗抽到一檔,葉楚航同薛寶力肯定唔會錯過機會。