Charlie預計會搵何佩瑜(Jeana)、江若琳、李雲迪愛徒李元玲同埋拍過《微交少女》嘅新人許雅婷(Kabby)演出,佢噚日接受電話訪問時話:「套戲當然唔少得動作,仲會有血腥同暴力,亦都唔少得性感鏡頭,男演員方面應該會係安志杰,導演係錢國偉。」佢話Jeana等一班女仔三個月前已經跟師傅練拳,𠵱家個個都操到有腹肌,Charlie話:「其實最想搵小紅姐惠英紅,因為佢拍過《霸王花》,如果佢肯拍,意義會大好多。」講明致敬《霸》片,題材當然都會類同,講一班新紮師妹喺警校時,畀人調咗去做卧底,套戲大概會喺5月開工,仲會去馬來西亞取景。
撰文:馮仁昭