當年今日
關於我們

【李八方online】仲講「3322+2」太out!首公佈「3322+33」考生人數

蘋果日報 2019/06/26 17:26

大學文憑試DSE考評局放榜李八方ONLINE

仲有兩星期就係DSE(中學文憑試)放榜,考評局每年都會喺放榜前,透過記者會同新聞稿公佈考生嘅成績統計,由於唔少大學近年陸續調整咗基本入學要求,同當初講嘅「3322+2」門檻已經相去甚遠,考評局從善如流,由以往淨係公佈最佳五科積點統計,今年將會第一次公佈最佳六科嘅積點分佈,同埋考到「3322+33」嘅考生人數,等考生放榜後有更多資料參考。
第1屆中學文憑試喺2012年舉行嗰時,本港大學入學門檻劃一喺「3322+2」,即係喺中、英、數、通識核心科目要攞「3322」,同埋最少喺1個選修科攞2級。不過,近年港大、中大、科大等幾間院校或者其他大學嘅個別科系,已經陸續提高咗基本入學要求,起碼要「3322+33」先可以入學,即係核心科目最少要攞「3322」,同埋最少喺2個選修科攞到3級。
一如既往,今年考評局將於喺放榜嘅前一日(7月9號),透過記者會同新聞稿公佈考生成績統計。今年除咗會公佈「3322+2」考生人數同最佳五科積點分佈,仲會公佈埋考到「3322」同「3322+33」人數、最佳六科積點分佈等幾項新資料。考評局仲會另外製作一份附加資料,將數學延伸部份(M1或M2)、乙類應用學習同丙類其他語言科嘅成績獨立計分,計落去總分作統計。
考評局製作咗一份附加資料模擬示例(詳情按此 ),各位應屆考生記得多多參考啦。
-----------------------------
7月4日起 《蘋果動新聞》只限升級壹會員閱覽
繼續撐蘋果!