係人都知自由黨榮譽主席田北俊係頭號薯粉，唔理西邊定北方意見，堅定不移喺跑馬仔中撐鬍鬚曾。雖然薯片叔喺建制派群星拱照林鄭月娥下，選情未見佔上風，但撐佢嘅田少喺選戰倒數前夕拉頭馬，會唔會係薯片叔最後跑出嘅好預兆呢？
查實身為「人民武士」馬主嘅田少，向來都係馬場嘅稀客，但係田少噚日一早就入咗場，為愛駒打氣，結果馬仔真係好生性，噚日喺沙田馬場澳洲騎師祈普敦胯下勝出第8場二班泥地1650米賽事。
八方嘅同事問田少，係咪練馬師約翰摩亞一早call定他入場等拉頭馬？田少好幽默咁話喎：「我今（噚）日入馬場，因為我嘅孫仔唔睬我囉！」原來田少噚日原本同孫仔約定坐船出海，但係因為天氣唔多好，所以取消咗行程，適逢「人民武士」噚日跑，咁佢咪入馬場為愛駒打氣。

6場贏580萬獎金

田少話呀，「牠（「人民武士」）近期跑草地表現平平，我估唔到佢跑泥地嘅表現咁好，只可惜泥地賽程選擇唔多，如果下次跑番草地，唔知道可唔可以交番今場嘅良好表現」。
原來「人民武士」至今兩戰泥地全勝，全為1650米，其餘4場頭馬為草地賽，呢匹4歲澳洲馬已累積6場頭馬，累積總獎金達580萬，今場頭馬佔99萬，另有75萬首次贏二班賽獎金，今場合共175萬獎金。唔知田少力撐嘅特首馬仔薯片叔，會唔會同樣旗開得勝呢？

李八方