喺香港馬圈，有一位馬主養馬資歷好淺，但每次愛駒出賽都好矚目，就係大明星郭富城，佢同張智霖合夥擁有嘅「愛將」，跑六場得四冠兩亞，公認質素超群，但去年12月中出賽後，至今已缺陣半年，原來「愛將」左前腿懸韌帶傷咗，傷勢都唔輕，Chilam日前接受訪問，亦承認隻馬有問題，唔知幾時先完全好番可以復出，而且難免花一啲醫藥費，但Chilam話好在隻馬贏落唔少獎金，暫時唔使同城城夾錢，「愛將」亦能自給自足，足以找馬醫院條數。
至於城城個人名下隻「愛的呼喚」，健康就好得多，雖然佢嘅質素冇「愛將」咁高，但演出都好準吓，曾經贏過兩場，近兩仗就接連跑第二，差少少運氣。雖然臨近唞暑，但「愛的呼喚」備戰依然好積極，今個月初試大閘，有前有後，以極佳走勢勝出，睇嚟城城有後着，唔會無了期咁等「愛將」復出，可能喺煞科前安排「愛的呼喚」搏殺，贏番場先算。