自由行帶旺香港，零售業額手稱慶，市面熱鬧好多。不過既然係自由行，好多唔同人等自由遊咗落嚟，要搵番啲水腳兼利潤，於是男人女人各出奇謀，賓架陳嘅老友前輩R平時比較嚴肅，畢竟前輩R經常出入人民大會堂，見慣世面，唔會同啲後輩亂咁發噏風也。呢日飲茶之時，前輩R忽然同賓架陳講：「你老婆鍾唔鍾意跳社交舞？」賓架陳話：「興趣不大。」前輩R話：「最近有啲朋友甚為煩惱，皆因太太愛上社交舞，日日去學。」學跳舞冇乜唔好？哦，講講吓，恍然大悟，跳舞好易過電，快三步（華爾茲）講求大髀緊貼，探戈更加纏綿，青年人容易生情，中年女人與靚仔教練跳多十次八次，亦可能春心蕩漾，何況比佢大十年嘅老公時時唔得閒，令佢芳心寂寞㖭。前輩R話：「唔少叻教練㗎，闊太爭住卜（book）。」

既有自由教練搵食，亦有自由尤物到處狩獵。前輩R到港麗酒店與洋人朋友飲番杯，洋朋友心不在焉，原來附近有尤物眨眉弄眼，連前輩R都忍唔住望多幾眼，年輕二十年就把持唔住咯。撞鬼，老婆來電，話掃貨掃到腳軟，就喺下面太古廣場停車場，叫佢落去做司機。前輩R等多十零分鐘先至入𨋢，𨋢門打開，尤物竟然已經企喺入面，主動向佢打招呼，又問平時去邊度多，呢個係我電話呀？前輩R為免誤會，支吾以對，甚為尷尬。到咗停車場，𨋢門打開，唉吔，老婆囡囡到咗冇耐，企響度等，一見到尤物與前輩R傾偈，疑心大起，面色一沉，前輩R叫聲苦也，呢勻水洗唔清。