27歲嘅Angelababy(楊穎)前日(17號)喺港安醫院，為老公黃曉明順產生咗6.4磅男B「小海綿」，今午約4點15分，生完「小海綿」嘅Baby終於出院，「小海綿」就由老黃曉明以黑色BB籃載住，未見「小海綿」真身(新聞連結： http://bit.ly/2iVD59Q )!

農曆新年將至，曉明同Baby今年悉心設計咗「筷筷生子」新年禮盒，個禮盒仲有一張卡寫上「金雞報曉，萬象更新，這是來自曉明與Baby的新年祝福，為朋友親自設計和訂製的伴手禮月，每一樣都意義非凡」，盒中有一對寓意「添丁」嘅筷子、一個2017月曆等，仲有一份好有心思嘅禮物!

北京受霧霾影響，曉明就搵咗荷蘭團隊，造咗50枚鑲嵌「黑寶石」嘅中國限量版「霧霾戒指」，係首次將北京霧霾顆粒送到荷蘭製作而成的。「黃曉明工作室」微博仲聲稱每製作一枚戒指就相當於淨化咗北京1000立方米嘅空氣，希望能用行動來支持環保，仲可以「還下一代一片藍天」。

係咪睇完都唔明想點？解釋番，呢隻「霧霾戒指」其實係由一位名為Daan Roosegaarde嘅設計師嘅概念，原意係佢喺眾籌網站收集設計「吸霾塔（Smog Free　Tower）」嘅款項，呢座塔主要功能就係淨化霧霾，而呢隻戒指就係由淨化得出嚟嘅霧霾粒子再壓縮而成嘅，用途就係送畀有份捐款嘅善長做紀念。係呀，係紀念品嚟㗎咋。(影片連結: https://vimeo.com/153695821 )

都係唔明？簡單啲嚟講即係喺屋企用吸塵機清潔完，之後就拎吸咗出嚟嘅污糟嘅拎去壓縮做戒指！睇落係咪好有意義呢？其實呢隻戒指喺淘寶都有得買，只係要39蚊人仔，曉明大哥點睇先？