「那是小孩的事，對不對？」前日兩名內地男子喺馬爾代夫坐飛機嚟香港，航程中三十零歲嗰個不滿另一個大叔同行嘅小孩滋擾而嘈交，點知飛機降落後，兩個又爭執扭作一團，喺機艙混亂中後生嗰個好似俾人摑咗一巴。佢兩個由機艙嘈到落機嘈足半粒鐘，好鬼長氣。
上演呢幕捲脷口水戰嘅係一架國泰CX602航機，當時剛喺馬爾代夫度完假嘅楊先生同機目擊事件，佢話飛機一land，乘客都起身趕落機時，兩個內地漢嘈起上嚟。
三十零歲較後生嗰個好似為咗趕轉機行先一步，其間同前一排嗰個年近60歲男乘客爭執，全機幾百人睇住佢哋嘈交。

不滿聲浪滋擾

兩個你一言我一語，老啲嗰個話：「那是小孩的事，對不對？」後生嗰個摸住塊面，頭岳岳連講3次：「小孩嗎？小孩嗎？小孩嗎？」目擊者楊生話事緣坐後面嘅後生仔好不滿大叔同行小孩成程飛機嘈嘈閉。
其間後生仔同大叔嘈過幾句，點知落機時又因碰撞問題嘈多次。空姐空少趕嚟勸交，但佢哋兩個無理，繼續罵、罵、罵。佢哋喺機艙嘈咗10幾分鐘，去到入境大堂通道又嘈多次，最後喺20號閘口想打交。同行親友及保安即刻分隔調停。
警方話當日朝早9點收到姓李內地男子（31歲）報案，話同姓周內地男子（58歲）爭執，但兩人否認打交，警方只列「糾紛」。