中區警署羈留房大公開
■報案室都有機會去過,但羈留房就唔係閒雜人等去嘅地方,可能有番咁上下歷史,不但比我們想像中簡陋,重有陣揮之不去嘅臭味,都幾惡心!
斷両秤,曾稱「中央警署」,又稱「大館」的中區警署,可謂本港最具價值古迹之首,當中最悠久是建於1864之營房大樓,及後警署逐漸擴建,到1995年,中區警署連同毗鄰的前中央裁判司署及域多利監獄,更被列為法定古迹。
這次旅遊事務署舉辦的「中區警署開放日」,會安排市民有1小時參觀時間,其中30分鐘是導賞遊,由導賞員講解歷史,1月30日的開放日還會加插1小時的「阿Sir話當年」環節。不過,鑑於這次導賞團只作局部開放,但對首次進中區警署的阿Low和Bonny而言,倒是彌足珍貴的機會。
導賞團先有導賞員講古,跟手直入營房大樓的報案室,再參觀羈留房,羈留房環境惡劣,瞓覺得塊鋪咗張氈嘅木板,開放式廁所又無抽水,𠵱家陣臭味都未散,更恐怖係聽聞呢度係全差館最猛鬼的地方。壓軸景點差人每日當更必到的槍房,之後再到香港島衝鋒隊指揮部,營房大樓算係匆匆睇過。
下半場戲肉集中在總部大樓與前中央裁判司署,前者主要講建築風格,而後者最特別係開放咗一個法庭。雖然今次參觀只係走馬看花,但阿Low同Bonny都同聲話好難得,因為開放日期間旅遊事務署會收集建築群日後用途的意見,有入場券的朋友,記得提出意見,為捍衞古迹出一分力。
1﹒睇警匪片都會見過嘅槍房,原來真係有個好似診所取藥處嘅窗口。
2﹒港島衝鋒隊指揮部辦公室已搬走,據說有大嘢PTU都會喺度集合。
3﹒呢個空空如也的法庭,乍看無乜嘢睇,但其實呢度係全港最早嘅法庭之一,一柱一石都有古講。
中西區文物徑共劃分A、B及C三段路線,今次我們到訪的中區線(A線),涵蓋42項歷史建築及遺址,除上述鄰近中區警署的建築物外,其他古迹詳情可參考古物古蹟辦事處網址: http://www.amo.gov.hk。
士丹利街這紅色指示牌究竟紀念甚麼?原來此處乃《中國日報》報館舊址,該報於1900年創刊,是孫中山先生於1899年命陳少白在香港籌辦的第一份反清言論報章,亦是興中會與各地革命黨人的聯絡處,此報僅發行了11年,現在只可憑弔牌上一張復印的黑白報紙了。
地點:士丹利街24號
又關孫中山事!這指示牌佇立於商舖前方,旁側有小巴站,並不顯眼,連Bonny都話:「遠睇重以為係時裝店宣傳板㖭,乜原來有嘢講㗎!」講乜?原來此處乃和記棧舊址,昔日的一間鮮果店,實際是革命活動基地,1903年廣州起義一役,都喺呢度策動及指揮志士㗎!
地點:威靈頓街24號
「藝穗會?我都喺度睇過展覽啦!」阿Low小朋友稍安無躁,這座1892年落成的建築物,前身是供應冰塊和牛奶製品的冷藏庫,70年代空置後因日久失修而破爛陳舊,至83年藝穗會進駐於此,經20年來8次重修,先有今時今日咁風光,可謂歷盡風霜。
地點:下亞厘畢道2號
離開藝穗會,往雪廠街方向進發之際,Bonny手指指道:「你睇,上面座聖堂好靚喎!」阿Low見狀即翻閱手上資料,「𠵱,原來都係文物徑其中一個景點喎!」此聖堂名聖保羅堂,於20世紀初興建,頂部建有尖長的塔樓,帶有哥德式建築風格。
地點:中環己連拿利
甫踏上石階,兩人即大叫:「好熟口熟面,究竟喺邊度見過呢?」其實唔難估,事關這條建於1875至1889年期間的石階,過往是不少電視電影的取景地,唔少男女主角都喺呢度相遇或分手,四座煤氣路燈則置於石階兩端的欄杆上,在本港已碩果僅存。
地點:都爹利街
要找尋這塊紀念及標記1841年海旁填海工程前原有海旁之牌匾,很艱難,走遍整條畢打街也未見蹤影,還是阿Low夠眼尖,在置地廣場入口處附近找到它:「我行過Landmark幾百次,都唔知呢度有塊牌匾。」深信唔少中環人同樣走漏眼。
地點:畢打街近置地廣場入口