今年平安夜不平安，告士打道無端「天降橫財」，成千幾萬新銀紙散落馬路，原來係中銀委託嘅解款車出事，有市民見有大批銀紙散落馬路，發揮香港人「執輸行頭慘過敗家」嘅精神，一張張一疊疊咁執走，有啲人仲坐的士絕塵而去，更有報道指有內地旅行團路經落車執走成5百萬，其實以往香港人成日笑內地啲新聞，有車翻側之後，內地人狂搶車上嘅貨，不理車主死活，o依家面對1500萬現鈔，其實行為同內地人有咩分別呢?

馬路跌錢呢啲情節咁似拍戲，其實係好多部戲都有類似情節，最近可以講返《寒戰》，講警務處副處長郭富城拎住個裝住好多現鈔嘅袋，係用嚟贖返彭于晏嘅，綁匪叫郭富城就咁將袋錢由天橋掟落橋底，然後錢散到一地都係，幾個魚販見到，拿拿臨想執走晒佢，其實比著你，你又會唔會執?

今次跌錢真實事件，令人知道，原來解款車用嚟裝咁多現金嘅箱，同運日用品嘅箱差無幾，都係膠做，開口亦唔會好似拍戲咁噴白色泡出嚟，用嚟裝幾億嘅設備，會唔會兒戲咗少少?