有位外國槍迷上阿仙奴官網買波衫，諗住揀印字嗰陣，發現驚天大秘密，7號波衫嘅主人竟然唔係阿歷斯山齊士，而係「韋大帝」韋碧克！英國《每日鏡報》同《每日郵報》都馬上跟進報道，後尾發現只係阿仙奴官網出錯，家陣已經整番好晒，韋碧克變番23號。

阿仙奴已經賣緊下季新波衫，入到去仲有得揀印咩球員嘅名同號碼，有外國槍迷望望吓，竟然見到「WELBECK 7」！韋碧克竟然着7號波衫，呢樣唔係最震驚，而係假如韋碧克拎咗件7號的話，咁原有嘅7號仔山神呢？唔通真係走！不過槍迷唔使驚，韋碧克變7號仔應該只係官網出錯，家陣已經改正番。