香港物價貴就係人都知，之前就有賣過百蚊嘅餐蛋飯，𠵱家又有超過$150嘅公司三文治。環球酒店網站 http://Hotels.com最近做咗個公司三文治指數調查，發現香港酒店賣緊嘅公司三文治價錢，係全世界排第8貴嘅，平均都要 $165一份。

半島連加一要$220

呢個調查揀咗全球28個城市，總共收集咗840間酒店嘅數據。調查發現瑞士日內瓦嘅公司三文治平均要$253一份，價錢「貴絕全球」；上年「冠軍」巴黎，今年就只得第2，平均價$228。
亞洲區第一位就屬東京，平均$171；香港排亞洲第2，反而盛產土豪嘅中國，只係$105，排22位，而香港人最鍾意去嘅台北仲抵，平均只係$96。至於最平嘅就係印度新德里，平均$68。
睇番香港，我哋就打去幾間五星級酒店問過，例如半島酒店，每份公司三文治連加一就要$220。文華酒店就要$229，洲際酒店就要$242，比平均價高，但發言人話個三文治好足料㗎，有英國煙肉、瑞士芝士、重有番茄、生菜、火雞同火腿。
http://Hotels.com就話，今年大部份城市嘅公司三文治價格都有下跌趨勢，對旅客係好事噃。