o靚界民主女神人紅自然多人爭，瞓身五區公投運動嘅周澄喺新界東一鳴驚人，身為選舉新丁嘅佢首度參選就攞到萬七票，成為落選候選人中最高票嘅票后。
年紀輕輕嘅佢已經頗得泛民支持者歡心，有人仲視佢係社運明日之星，唔少政黨向佢招手，希望有個可靠下一代為民主接班。

公投後被睇高一線

其實早喺周澄去年積極參與平反六四嘅活動時，唔少政黨已經打探佢嘅背景，覺得佢潛力無限，係下一代民主運動嘅最有前途新人。
八方聽聞當時周澄已經表明心迹，話自己屬於自由行動派，唔想俾任何政黨束縛，各泛民政黨聽到之後，就冇付諸行動去「搶購」呢位新星。
但5.16公投結果就令好多人再度對周澄睇高一線，再以鍥而不捨嘅精神去招攬周澄。當中肯定以丐幫社民連表現最積極，話說社民連覺得周澄屬行動派，同社民連好啱key，公投期間同黨友長毛仲合拍到似拍乸多過似對手，於是派出主席陶君行同秘書長季詩傑相約周澄傾入黨問題。
八方聽聞嗰次會面大家都有傾有講、客客氣氣咁啦，但周澄就冇一口應承會入黨。點知呢次會面消息唔知點解會走漏風聲，唔少人誤以為周澄已經入咗黨，好多人即時大讚周澄抵得諗，肯為丐幫注入美麗新動力。

冇政黨包袱最自在

但原來一切都係誤會。周澄向八方澄清，佢連入會表格都冇填到，又何來已經係黨員？半隻腳投身咗政壇嘅周澄至今覺得，冇政黨包袱下搞社運先至最自在，所以佢都係寧願繼續做個社運自由人，社民連嘅一番好意佢惟有心領，聲言日後仲有好多合作機會o架，睇怕呢次都係「襄王有心、民（主）女（神）無夢」。
有傳周澄好大機會喺2012年再戰立法會選舉，周澄都再三強調暫時都係鍾意做社運工作多啲；佢話就算畢咗業，都係想去NGO（非政府機構）做嘢，冇諗過從政。當然政圈嘅嘢從來都係只爭朝夕，遠啲就冇人預計得到。

mailto:[email protected]