今屆世界盃民建聯一開始就喺facebook出post，列出多場賽事開場時間，仲表態支持邊隊，接連撐其中2隊熱門德國同阿根廷，結果成為「燈神」，2隊分組賽首仗都贏唔到，阿根廷和咗、德國直情輸埋。民建聯畀2隊fans鬧爆，希望高抬貴手唔好再搞愛隊。阿根廷第二場鬥克羅地亞，民建聯唔敢再出招，但結果阿根廷喺「DAB魔咒」下繼續沉淪，門將犯錯兼成隊表現差劣，慘敗0：3，分組賽最後一場即使贏波都可能要出局。

5大熱門巴西、法國、西班牙、德國及阿根廷中，法國同西班牙都無被民建聯「寵幸」，2隊現時分別得6分同4分，出線情況樂觀；首仗和咗嘅巴西出線情況要打埋今晚第二場先明朗。八方同啲球迷講開，而家最驚嘅就係德國fans，擔心愛隊會步阿根廷後塵，一開始被「DAB魔咒」揀中，就一直衰落去！

德國分組賽首場輸畀墨西哥0：1之前，民建聯fb出咗幅陳克勤同葛博士嘅海報，大大隻字寫住「我哋撐德國隊」，列晒德國隊3場分組賽嘅比賽時間，賽後球迷喺民建聯fb留言「德國隊最黑暗的一天」。德國嚟緊喺香港時間周日凌晨就打第二場，對住已有3分在手嘅瑞典，再輸就幾乎肯定出局，一班德國fans真係唔知點算，唯一希望係民建聯唔好喺第二場賽前「踩多腳」再出post喇。

不過，話說回頭，民建聯都出post捧過英格蘭同比利時，2隊無被捧為大熱門嘅隊伍首場都順利勝出，「DAB魔咒」無喺佢哋身上應驗。八方覺得，民建聯其實可以逆向思考，德國對瑞典比賽前，出個post話力撐瑞典，試下「DAB魔咒」應唔應驗都好呀，但係唔好好似日前英格蘭嗰場咁，出錯人哋國旗喎。