【新增圖片】

仲有唔夠2個星期，就係華仔劉德華嘅57歲生日，華仔一直好支持兼旗下映藝劇團有份合辦嘅音樂劇《尋找快樂時代》，今日一眾演員包Kolor嘅Sammy、RubberBand嘅阿偉及KB等，今日就率先同華仔食飯慶生。

可以同華仔慶祝生日呢個機會並唔係人人有，有咁難得嘅機會，大家當然都好開心，Sammy同老婆盧巧音（Candy）都分別喺ig出post，post出同華仔嘅合照，而Candy更寫住：「法官大人我無嘢講啦！華仔哥哥生日快樂身體健康平安喜樂」，而佢仲話自己今晚應該開心到瞓唔着添。

至於因《尋找快樂時代》得到第27屆香港舞台劇獎「最佳女配角」嘅吳鳳鳴，更攞埋個獎去同華仔影相，更寫住：「預祝華仔生日快樂！攞住尋找快樂時代嘅獎，同尋找快樂時代嘅老闆一齊影相。好開心呀！」睇各人同華仔嘅合照，華仔除咗有型、靚仔外，仲表現得好鬼馬，相信除咗佢哋開心外，華仔今晚都好開心。

華仔忠粉、名模歐陽妙芝當然都有出席，佢今日凌晨貼咗同偶像合照，仲留言：「今夜好心情。」當然仲要加心心圖案。「鬼王」潘紹聰都有貼相，依家全城搶購華仔演唱會飛，潘紹聰話：「唔好問我劉生演唱會飛！#做咗廿幾年DJ第一次同劉生合照 #劉生生日快樂#尋找快樂時代 #多謝劉生」

精選娛聞，喺晒《娛果》
http://fb.com/appledailyent