每年10月開始，都是酷愛旅遊的港人計劃遠征北歐追逐極光的旺季。對於港女阿丹來說，極光是不用追訪的，抬頭仰望即是。兩年前移居冰島的她，甫踏進這個冰與火的國度便不能自拔，愛上冰島的慢，戀上冰島人的與世無爭，尋獲她心中的真自由。

記者：蔡元貴

大約5年前，劉月丹留學英國修讀傳播學碩士，「讀書之後其實就習慣咗外國生活，3年間一直想去冰島玩，但係一直陰差陽錯冇去到。之後遇到一個住喺冰島嘅男仔，就來咗冰島玩，嚟咗之後非常喜歡冰島呢個地方」。現年25歲的阿丹畢業之後嘗試在冰島搵工，碰巧一間旅行社招聘懂中文的網絡寫手，阿丹順利獲聘，就這樣在與香港相距接近一萬公里的冰島留下來。

自稱「冰島港女」的阿丹是全職blogger，為旅行社撰寫旅遊攻略與景點推介文章，藉此招攬團友。從繁華的亞熱帶飄流到冰冷的北歐島國，港女反而覺得自己找到烏托邦：「覺得呢個環境好舒服，各種節奏都比較慢。反而返香港覺得比較辛苦，或者係節奏太快。」

「好簡單，你行路，喺香港你行慢啲都會被人「摺」㗎嘛，喺supermarket買嘢企喺度揀，阻住個人，人哋會「摺」。但係呢邊完全唔會，一來人少喇，二來你阻住我咪行第二條路囉，唔會好offend（得罪）到佢哋，佢哋會尊重每個人嘅生活，佢唔會因為你係咩人，唔會因為係唔係冰島嘅人就會點」。

她說冰島人特別簡單，這是她喜歡冰島的原因之一：「喺冰島可以真係搵到自由，無論你係咩人，性取向係咩，來自邊度，都可以獲接納，唔需要擔心人哋點睇。香港雖然好多人話係自由社會，但係依然存在唔少因為身分、地位或者其他各種因素而產生既分歧，喺香港生活壓力非常大。」

其中一個明顯差異，是工作環境。曾在香港當實習的她說，兩地企業文化很大分別，「喺香港好多嘢都會推住你去做，相對冰島壓力就唔會咁大。就算係CEO、CFO放假都會同前線員工一齊玩，喺香港咁嘅環境比較少啲」。她形容目前的工作完全沒有壓力，「冰島嘅人係唔會追quota（跑數），或者一定點點點，佢哋比較casual（隨便）一啲」。

讀到這裏，是不是很羨慕這位冰島香港人？未算。冰島吸引阿丹的另一點，是置業夢想沒有香港那般遙遠：「普遍來講，冰島嘅人工都係高嘅，喺度掙嘅錢喺度使，係一定夠你開銷，儲錢係有可能買到屋嘅。我有同事喺度做咗大概2、3年左右，佢今年已經買到自己嘅屋，係靠自己，完全冇靠屋企。但係如果我返香港，衰啲講我一定要靠屋企，或者係靠其他人先可以自己搬出來住。呢度樓價唔係好貴咋喎。依家市中心假設有人賣嘅話，大概都係5、600萬港紙左右可以買到間屋。」

阿丹還未算是冰島人，她需要在這裏住滿4年才可申請入籍。移民冰島並不容易，她解釋，冰島沒有投資移民這種途徑。「只係可以喺度做嘢，跟住喺度攞簽證，或者係同冰島人結婚，最主要都係呢兩種方法。可能最早嗰批中國移民，據我所知就係冰島人請嚟喺餐館做厨師，之後掙到錢就自己開餐館」。

即使符合移民資格，還要克服冰島的簡樸生活，「喺香港，想食咩落樓就有得買，呢邊如果出去食飯就係burger（漢堡包）或者牛扒，選擇好少」，又例如蔬菜，幾年前超市只有5款選擇，如今多了，也只不過10種左右。

「我成日聽到人講，你移民冰島真係好正。咁我唔係日日都喺出面玩㗎嘛，佢哋會覺得我喺冰島就係日日出去行山，玩瀑布爬冰川。呢度相對香港來講基本上係冇娛樂，喺香港你無聊可以行街、可以唱K，好多其他活動，但係喺冰島，一係就出去行山，一係就喺屋企，比較少一啲額外嘅娛樂。所以其實呢度儲錢都比較易，因為冇地方使錢。如果喺香港行街，呢度買件衫、嗰度買個袋，呢度你就好難使錢」。

冰島氣候並不宜人，最難適應是突如其來的強風，「佢嘅風係四面八方喺唔同嘅方向吹襲埋來。有好多遊客落車唔記得閂門，個風一嘢就將車門反轉。我自己試過去行山，上到山頂啲風超級大，係完全企唔到，我係幾乎喺個山頂坐住咁落山，好驚」。

驚還驚，阿丹似乎還是愛冰島多於香港，「香港現在的感覺和小時候的感覺已經唔太一樣了，或者都係因為大家都開始有咗生活的壓力，亦需要適應社會的節奏，同以前讀書的時候比的話，冇咁美好」。人，總是嚮往美好的。