中英兩國過去百幾年恩恩怨怨，真係一疋布咁長，由清朝八國聯軍之役，數到上世紀末嘅九七香港回歸，呢段歷史都係怨多恩少。之不過咁，地球係圓嘅，況且政治冇永遠嘅敵人，總有一日做朋友，八方收到風，兩國最近有啲微妙接觸，聯手搞咗個好有意義嘅活動。

話呢單嘢有意義真係一啲都冇誇張㗎，因為大英博物館破天荒第一次喺故宮嘅午門擺展覽，今個星期五正式開幕，展覽為期三個月。喺氣勢迫人嘅紫禁城裏面展出百幾件大不列顛帝國收藏嘅古老文物，裏面有啲仲係平日難得一見嘅中國收藏品。
撮成今次中英好事嘅靈魂人物，原來係一個香港人。呢個出錢出力、穿針引線嘅國際級紅娘，就係香港歷史悠久嘅何東家族後人何鴻毅。
何先生係已停刊嘅《工商日報》社長，近年成立咗何鴻毅家族基金，贊助一啲有藝術才華嘅香港年輕人出國深造，又致力令番邦了解中華藝術文化，今次搞得成呢個前無古人嘅歷史性展覽，八方真係好佩服何先生嘅勇氣同魄力。

花咁多人力物力搞個展覽，擺得喺紫禁城嘅，件件都係國寶級珍品，當中唔單止有中國收藏品，仲有啲好有歐洲文明神髓嘅文化藝術作品，包括浪漫之邦意大利嘅三位大師達文西、拉斐爾同米高安哲羅嘅精品。企喺故宮午門入面睇呢啲西洋藝術經典，感受嗰種異國矛盾嘅衝突感覺，真係諗起都覺得震撼心靈，搭飛機去睇都有着數。
呢個展覽無疑係會觸及一啲敏感問題，因為八國聯軍當年攻入北京搶走珍品，好多人指大英博物館裏面嘅藏品，唔少都係賊贓，應該要歸還。咁呢次大英博物館響故宮嘅展覽，會有啲乜嘢中國展品呢？中英兩國有咁多有政治智慧、外交經驗嘅專家，八方斷估都唔會搞出風波。既然係咁，大家亦唔需要孭住咁沉重嘅歷史包袱，用最開放嘅胸襟、最國際性嘅視野，望穿歷史長廊，屏息靜氣欣賞前人留畀我哋嘅瑰寶。