由韓國男星朴敘俊跟女星朴敏英合作嘅tvN新劇《金秘書為何那樣》現時喺韓國熱播，上周播出第三及第四集，劇中朴敘俊飾演霸氣富二代，而朴敏英則飾演做咗朴敍俊9年秘書，因為有感冇晒私人時間，因而決定辭職，令到朴敍俊開始審視同朴敏英嘅關係，仲發現自己好似愛上咗朴敏英。

其實頭四集已經交代咗朴敍俊對朴敏英情有獨鍾，朴敏英了解佢嘅一切，而朴敍俊亦只允許朴敏英同佢有接觸，見到朴敏英同異性相睇或有親密舉動時，朴敍俊亦大感呷醋，兼睇到眼火爆。劇情亦講到二人之間流露出曖昧嘅氣氛，好似第三集結尾及第四集開頭，朴敍俊因為呷醋朴敏英喺公司運動會上同其他男同事好close，所以佢就質問朴敏英係唔係為咗贏即使同唔認識嘅男人都可以好親密，朴敏英就直認不諱，於是朴敍俊就一嘢拉咗朴敏英入懷。

不過呢幕劇迷就睇到好冧豬，但事實上拍攝過程就唔多易，劇組就公開拍攝時嘅花絮片段，呢幕場面二人都拍咗好耐，因為要就鏡頭演繹撲倒嘅場面，所以佢哋都要NG多次，加上二人又忍唔住笑，有次因為綵排時太大力，搞到朴敍俊拉親膊頭，佢仲開玩笑指自己被朴敏英拉傷，令朴敏英不停道歉。最後要經多次拍攝才成功拍攝呢一個場面。

相關花絮片連結： https://bit.ly/2t1KNE6

更多韓流，喺晒《娛果》
http://fb.com/appledailyent