當年今日

尼斯達加度素同上榜
求驗客手記:型男野獸聚AC

蘋果日報 2003/09/15 08:00


喺一項由外國做嘅最性感球員調查中,尼斯達同加度素分別被評為「意甲最性感」同埋「意甲最唔性感」球員,即係話意甲性感型男同野獸齊集AC米蘭。不過最搞嘢係迪比亞路響最性感同最唔性感都榜上有名,唔同球迷嘅睇法都真係幾極端喎。
呢個訪問咗一千二百個男女球迷嘅調查,碧咸響最性感球員一項得票最多,其次係施丹、波勒,尼斯達就排第四,只計意甲就係一哥。加度素外形粗獷,喺球場上又係鬥牛㹴,被評為最唔性感可謂「大熱勝出」。迪比亞路分別響意甲最性感同最唔性感都排第四,計正以佢外形、衣着品味同畀人嘅感覺都應該未致於唔性感,唔知係咪有啲女球迷唔鍾意佢同女友太好,因愛成恨呢?

麥基迪爆隊友係「基佬」
NBA魔術隊主將麥基迪最近接受一本雜誌訪問時,爆料話充滿男子氣概嘅NBA竟然有五個巴仙嘅球員係「基佬」,重話自己球隊裏面都有一個,但就冇透露係邊個;我求大俠就真係好懷疑佢嘅說話有幾成真,睇怕麥基迪都係估估吓,呢位球星向來都係大嘴巴見稱㗎啦!
西班牙波軍情咪盡信
前晚西甲皇家蘇斯達對桑坦德場波,明明通訊社講到皇蘇傷兵纍纍,估唔到高華斯域失驚無神復出踢正選,重傳個靚波畀迪保拿建功,你話買咗桑坦德嘅唔谷氣至奇。唔止咁,話有傷嘅李天秀亦後備上陣,所以話呢,西班牙嗰邊嘅足球資訊唔發達,就算有都咪盡信。

紅軍贏波失巴路士
利物浦作客砌低布力般,但球迷咪開心得太早,因為狀態唔錯嘅巴路士同對方巴布碰撞後足踝骨折,要施手術長唞到新年,另外加歷查響比賽中斷腳,重要唞半年㖭,兵源方面有啲壓力。講時講,巴布係由利物浦外借去布力般嘅,巴路士呢次衰響自己友手上,都咪話唔黑仔。

樸茨茅夫輸12碼唔抵
前晚各大聯賽出現唔少十二碼,最爭議都算係阿仙奴皮利斯對樸茨茅夫時博到嘅十二碼,賽後輿論普遍認為皮利斯插水。事隔幾個鐘頭,西維爾前鋒D施華對拉科時又插水,球證指完十二碼覺得唔對路,問完旁證後改變判決。拉科得到球證明察秋毫,老樸真係唔恨得咁多囉。