本年度必看韓片《逆權司機》由《義兄弟》導演張勳執導，並由韓國影帝宋康昊、劉海鎮、柳俊烈及湯瑪士基斯曼（Thomas Kretschmann）主演，電影上月喺韓國開畫以來屢創佳績，電影上映19日已破千萬觀影人次，更成為今年韓國首部千萬電影。《逆權司機》噚日終於「駛」到嚟香港，於香港正式開畫。

雖然《逆權司機》嘅導演張勳未能親自來港為電影宣傳，但佢日前就接受《蘋果》嘅訪問，當中佢就完全唔避忌，對有關政治嘅問題都樂於作答。

記：記者 張：張勳
（一）找到金士福令人驚喜
記：根據韓國傳媒報道，前總統全斗煥方面指控電影與事實不符，並擬提出控告。當中亦現實中嘅的士司機兒子指男主角嘅背景同事實不符。拍攝前是否有預想過會受到這樣質疑？是否已參考足夠事實去進行拍攝？

張：我根本冇想過前總統全斗煥嘅反應。也許因為今年4月出版了《全斗煥回憶錄》，而《逆權司機》又提到光州民主化運動。我作為《逆權司機》嘅導演，對於前總統全斗煥嘅回應，係這部電影基於一個真實嘅故事，除了電影中重新創作嘅一些人物外，事件係基於歷史證據。

張：至於「金萬燮」（電影中嘅假名係「金四福」）嘅原型人物金士福，佢兒子指出電影中嘅的士司機背景同現實不符，呢件事係開畫前冇預料到。準備電影時，唔係太多關於真實人物嘅信息，除咗有關Jürgen Hinzpeter記者及兩、三個線索外，其他都不得不以電影嘅方法重新創作。我認為可以添加更多嘅電影想像力，令金四福成為一個更普遍嘅角色。我有想過如果可以透過電影找到當事人就好了。實際上我透過金士福嘅兒子知道金士福嘅事，呢個係一個電影之外，令人驚喜嘅經歷。如果我係準備電影嘅時候遇到金士福嘅兒子，而非電影公映後，我想電影中嘅「金萬燮」會同現時播出嘅非常不同。

（二）民主之路越來越成熟
記：導演出身喺1975年，呢段光州事件發生時只得5歲，對於那個時候發生嘅一切有絲毫印象？如何看韓國從軍政獨裁走向民主自由道路，民主之路是否有褪色？

張：我當時5歲，好遺憾冇有關當時嘅記憶。從1960年嘅419學運、1980年嘅518光州民主化運動、1987年嘅610民主抗爭，以及2016年冬天光化門燭光集會來睇，我認為我哋可以睇到韓國嘅民主化係唔係變得成熟。我認為係變得更成熟嘅。而且我覺得現時有變得更民主嘅可能，因為有好多市民嘅犧牲及勇氣，佢哋抗議諸如518光州民主化運動一樣嘅軍事暴力鎮壓。

（三）想向年青人傳遞訊息
記：外界都視《逆權司機》係反映當年民運真相嘅電影，創作電影時係將它設定為充滿政治意識嘅電影？還是如宋康昊受訪時指係想反映做人道理嘅電影？

張：相比起有特殊嘅政治意識，作為一名國民，我認為我現在享有嘅自由及民主，唔係咁樣（甚麼也沒做）就獲得嘅，而係因為過去有許多市民嘅犧牲及勇氣，我哋先獲得呢啲。如果唔參與製作這部電影，我會一直覺得對佢哋有所虧欠。而且到目前為止，518光州民主化運動仍然係未完全解決嘅歷史。我認為過去嘅錯誤歷史應該被糾正，即使需要時間。作為呢部電影嘅導演很有意義，而且拍攝電影嘅時候，我想向唔知道37年前光州民主化運動嘅年輕一代傳遞訊息。

（四）鎮壓有相似六四部份
記：光州事件同「六四」很相似，韓國觀眾有幸喺大銀幕從新審視呢段歷史，香港觀眾欣賞電影時有很大感觸，2014年香港都有「雨傘運動」，你有留意？會否想創作有關「雨傘運動」話題嘅電影？覺得光州事件與「六四」相似嗎？

張：之前透過新聞知道少許2014年香港「雨傘運動」嘅事。如果要拍攝有關雨傘學運嘅電影，我覺得要由香港嘅電影人來拍攝先會拍得更好。光州民主化運動同天安門事件，在軍隊血腥鎮壓市民對於民主訴求方面，係有相似嘅部份。

（五）宋康昊感動觀眾心靈
記：宋康昊曾經一度辭演角色，係唔係非宋康昊就唔會開拍？最終如何說服佢拍攝？給予佢表現多少分？

張：如果宋康昊唔演出，我想我也唔會製作《逆權司機》，冇其他可以替代嘅演員，而且好難想像由其他演員飾演呢個角色。幸運地，過咗一會兒後，佢決定答應演出。我並冇說服他，應該係作品本身說服了佢。電影中宋康昊嘅演技，就係《逆權司機》嘅本身。我覺得宋康昊嘅演技就是像小市民一樣，向觀眾傳達所有事，佢的表演能夠真誠地感動觀眾嘅心靈。

（六）希望奧斯卡有好結果
記：有預期過電影會這麼成功？連海外評分都相當高？更有望出戰奧斯卡最佳外語片，有信心成功入圍？

張：有想過電影有好嘅表現，製作電影時，希望向觀眾傳遞作品嘅用意。不過電影比預想中獲更多觀眾支持，我冇想過會這樣成功。至於《逆權司機》有望出戰奧斯卡，目前仍未知道，我希望有很好嘅結果，但似乎係好難預測。