吳千語、譚耀文等人今日在柴灣出席黃百鳴投資嘅戲院開幕儀式，而陳靜戴口罩低調到場，逗留一陣就離開，黃百鳴戲院投資數千萬元，之後會喺其他地方開戲院:「Cepa只係大陸獨贏，對香港完全冇幫助，而且戲院唔多，原地踏步唔超過廿億票房。」

之前傳聞吳千語同林峯分手，今日吳千語就話冇咁嘅事：「耐不耐就傳分手又結婚，唔想回應。我哋各有各忙。」傳聞林峯唔滿意她夜蒲，她就話只係咁啱被人影到，兩個人各有朋友圈子，不過都會一齊聚會。有指林峯送樓築愛巢，吳千語就表示:「（樓）唔關我事，我打算自己置業。」

問到幾時會結婚，吳千語就話林峯家人冇催婚，不過佢就希望自己30歲左右結婚，不過到時林峯先至生仔會唔會太遲，吳千語話:「呢啲係緣份，我都想結婚即生，但都要做好事業。」仲話視林峯為結婚對象，但係兩人就忙到冇時間計劃結婚。