吳君如今日應邀出席第一屆「最港電影大獎」，擔任頒獎嘉賓，支持香港電影。頒獎禮後君如接受訪問，笑言：「其實我好開心，因為個獎好有意義，我本人都好支持港產片嘅！我都拍咗港產片三十年喇，有呢個獎去表揚港產片係一件好好嘅事，而且又有咁多觀眾投票。」

咁君如今年會否發力，來年都嚟競逐第二屆「最港電影大獎」呢？佢話：「拍戲唔係為攞獎嘅，要有作品俾大家睇。但係呢個獎會令我哋拍戲更加有動力。好多謝《蘋果》有呢個獎，可以令我哋拍多啲有港味嘅電影。好希望可以搞多啲，認受性更強一啲，好似美國咁，由一個好細好細嘅頒獎禮搞上去，係好事嚟嘅。」

咁君如有冇興趣自己投資電影呢？佢就話佢有份監製嘅電影，其實都有份投資0架：「除咗劉德華熱愛香港電影之外呢，吳君如都好熱愛香港電影0架，不過要蝕呢，就真係要蝕到入肉囉。咁所以希望真係可以搵啲好嘅project去做。」

出爐「最港男演員」劉德華頭先都話，投資拍戲對佢嚟講就好似一種習慣咁，亦承認有時對公司構成一定財政壓力，但佢本人會喺做演員嗰Part賺番，君如就打趣謂：「我嘅人工冇男演員咁高，所以我都要睇住自己啲資金，睇下有幾多成本去拍啦。不過其實我喺有啲場合遇到啲新晉編劇同導演，都會同佢哋傾下有乜嘢合作可能性。

「我自己做過幕後，真係感受更加深，真係知道入面做緊乜嘢，真係咬關去做，係一件好艱巨嘅事。」

場地提供：香港東隅