沈震軒(Sammy)去年底離開大台之後，返咗大陸拍戲搵人仔，發展都唔錯，之前同譚耀文、盧惠光合作拍咗部電影《風不止》，早排又孭飛做男一演網絡電影《人在江湖飄》，最近又接咗個移民廣告，Sammy話：「呢半年嘗試咗好多新工作，但我最鍾意都係拍電影，好想拍動作片。」

喺大陸搵食一排，見Sammy瘦咗唔少，佢話呢大半年努力，加上又想操練完美線條加六嚿腹肌，所以喺飲食方面都特別小心，希望將來可以喺電影界發揮所長。佢話：「機會係留畀有準備嘅人，所以呢半年一有時間就跟教練學拳、做Gym，至少外型上要合格，出拳有力，期望暑假可以練出成績，畀大家驚喜！」

除了練大隻，為電影發展鋪路，Sammy對音樂嘅熱誠，依然冇放棄，佢話：「大家識我主要係拍電視劇同電影，其實我都有參加過《英皇新秀》，仲入咗5強㗎！近排我有同唱片監製一齊作歌，希望下半年除咗電影作品之外，仲會有新歌畀大家聽。」