當年今日
關於我們

【自由無價】袁弓夷誓言餘生抗爭到底:留島不留人?憑乜?

蘋果日報 2020/06/05 06:00

袁彌明特朗普中美開戰袁弓夷

去年反送中運動,走在前線的多為年輕抗爭者,看到一班無私付出、一再被警方濫捕濫暴但沒畏懼退縮的年輕人,不少銀髮族亦被感動加入戰線。袁彌明的71歲商人父親袁弓夷過去一年不停為抗爭者發聲,及至最近人大通過「港版國安法」,香港將面臨一國一制,自由被收回,袁弓夷早年居住美國紐約曼克頓時,曾跟當時未做美國總統的特朗普(Donald Trump)做過樓上樓下鄰居,袁弓夷上周即撰寫英文信致特朗普,講出香港現況,請求他出手協助。
出生在上海的袁弓夷7歲來港,在中國住過20年,在美國住過20年,更在香港住過逾30年,透徹理解三地政局,他希望用人生閱歷和生命僅餘的時間,跟年輕人共同捍衛香港這個家。人大已通過「港版國安法」,袁弓夷認為此刻只有國際出力才能制衡中共,特朗普近日都開始向中國出招,上周表明美國不會再視香港為一國兩制,而是一國一制,美國將開啟程序撤銷對香港的特殊待遇,並會制裁削弱香港高度自治的中港官員,袁弓夷分析不排除中美會開戰。
屆時中國未必被美國壓倒,「北京夠野蠻,佢講乜都係啱,佢冇道理,唔聽人講。」袁弓夷表示若中美開戰,香港肯定是受害者:「兩個巨人喺小香港度打,到時我哋要做好心理準備,至少6個月到1年,香港人會好艱苦。大家最好儲定錢,儲夠1年糧食,勒緊肚皮,而家已經算短兵相接,你一招,我一招,唔係虛張聲勢,升級就會打仗,海戰、空戰,甚至飛彈戰完全係可能發生嘅,希望今年內會結束。」袁弓夷估計中國國家主席習近平下一步棋會「縮」:「習總呢個人,每次嚟個勢都好強,但6年政績,都係虎頭蛇尾,佢可能覺得咁做就夠,做咗就得到國內人支持。呢次佢6成機會會退讓,反而美國今次未必會放過佢,因為疫情死咗成10萬人,美國原本只係20萬人失業,而家增加到4,000萬人失業,損失係6萬億美金,特朗普砌低你,選民會睇到佢為美國人出咗啖氣。」
香港人去年至今,先經歷社運,再爆世紀疫症,經濟民生大受打擊,過慣安穩生活的港人再遭戰禍肯定叫苦連天,袁弓夷坦言:「我哋都好咗好耐,幾多人苦過我哋?香港人真係好好運,錢有得使,又有好嘢食,係住得辛苦啲啫!香港人爭取自由,真係要付出代價,有錢佬爭取緊佢哋所謂嘅自由咪就係移民。唔係個個人有咁嘅能力,佢哋咪要維護自由民主法治。唔好睇小呢班𡃁仔,佢哋真係明白事理,我哋細個就話戇居居,佢哋(抗爭者)日日上街,知自己要乜嘢,佢哋冒住俾人拉、俾人打都堅持爭取,佢哋好了不起。」

袁弓夷有甚麼寄語給這班年輕人?「佢哋仲清醒過我哋呢輩,佢哋應該去教吓班90幾歲嘅濶佬,教吓佢哋點去做人,點去尊重香港嘅自由,唔係淨係佢自己嘅自由。呢班有錢佬個個都自私,大陸係咁踩入嚟,係大陸違背咗一國兩制,呢班濶佬為咗好處又唔敢出聲,佢哋係香港罪人、賣港賊!如果以中國利益嚟睇,佢哋亦係賣國賊。反而呢班後生仔係我哋嘅將來,所以我寄語佢哋要繼續做,有美國人支持佢哋。」
袁弓夷當然希望有生之年見到抗爭成功:「我大膽估計,今年係最好時機,疫情令全世界死咗咁多人,中國知道自己闖咗禍,全世界見到香港咁又同情我哋,中國經濟一塌糊塗,咁嘅情況下抗爭係最好時機,如果過咗今年就難好多,到時唔知特朗普仲在唔在位。而家係『Perfect Storm』完美的風暴,今年唔出力,明年唔知仲有冇機會喇!」袁弓夷呼籲大家走國際線,把真相傳出去。日前是「六四31」,基於限聚令未解封,巿民今年未能到維園集會,有機會各區遍地開花,袁弓夷提醒大家:「要精啲,要大聲出力,唔好無辜俾佢哋拉,唔好傷咗自己身體,而家犧牲係冇用。」
已71歲的袁弓夷望善用餘生出力抗爭到底:「我呢個年齡,最緊要係仔女同兒孫,佢哋前途梗係重要過我,再過10年8年我都冇喇,對佢哋嚟講就啱啱開始。若果要生活喺共產黨統治下,點做人呀?咁嘅環境日日要講大話、日日要受氣,點會有前途?」即使可以移民,袁弓夷指也是做二等公民,「我哋初初上海過嚟,開頭都好辛苦,去到邊度都俾人歧視,要喺一個地方累積落去先會成功,我唔想下一代移民,想佢哋可以喺健康環境下成長,將來一代好過一代。我仲有10年工作能力,我想好好利用呢段時間幫助年輕人,製造一個好嘅環境畀佢哋成長,呢啲係我嘅責任,咁快退休,就好快死。好多後生要搵食,未必有時間拎出嚟,我攞得出呢啲時間,又有人生經驗。」
袁弓夷並不擔心「港版國安法」會秋後算賬,立場堅定的他說:「我驚就唔會行出嚟,中國14億人口點解冇改良?咪因為個個都驚,冇人敢行出嚟!咁咪世世代代都係咁,咁咪(做)奴隸囉!你想做奴隸定自由人?就係咁簡單。大家要對惡法出聲反對,睇住年輕人被濫暴,大人反而匿埋?有冇搞錯!咁點做大人呀?有錢佬怕荷包大縮水,到底佢哋係咪覺得錢緊要過正義?定錢重要過自由?我鎖住你,就算畀好多錢你都冇用,自由定名譽重要?自由先係無價。」袁弓夷不屑一國一制,「而家個個都話移民,難聽啲移民咪係難民。香港係我哋個家,(大陸)而家踩入嚟,要趕我哋走,留島不留人,佢哋憑乜嘢呀?香港係屬於香港人,上海係屬於上海人,點解大陸走過嚟,話香港係你嘅,咁即係搶。」
撰文:比華利
攝錄:廖達燊、林賓尼
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
empty
袁弓夷表示中美一旦開戰,港人要有心理準備捱苦。
empty
袁弓夷表示香港是屬於香港人 。
empty
袁弓夷每天都留意政情 。
empty
袁弓夷希望能用自己能力和閱歷力撐抗爭者。
empty
訪問當天,袁弓夷見到民主黨的反國安法街站,他上前簽名和捐款支持。
empty
袁弓夷細閱反國安法單張。
empty
袁弓夷和袁彌明父女524 在銅鑼灣出現時,撞正警方放TG驅趕巿民。(資料圖片)
empty
袁弓夷講到抗爭學生被濫捕和濫暴,不禁流下傷感眼淚。(資料圖片)
empty
袁弓夷拍片讀出給特朗普的英文信時,大女到場陪伴。(資料圖片)