韓國JYJ成員金在中，原本係東方神起成員，不過於2009年因合約酬勞分配等問題，就同隊中嘅朴有天同金俊秀齊齊離開原本所屬嘅SM事務所。

事實上SM近年已有多位藝人離巢，除咗金在中等三人外，男團EXO嘅三位中國成員鹿晗、Kris及Tao都先後退團，近日就連少女時代嘅秀英、徐玄同Tiffany都話唔續約。至於男團Super Junior，中國成員韓庚亦於2009年向SM提出解約。

雖然佢哋選擇退團，但由於以前屬同一公司，所以感情就冇變，而金在中今日凌晨就喺網上上載同韓庚嘅合照，更留言：「我們相見是時隔近十年的重逢」，金在中更搭住韓庚嘅膊頭合照留念，兄弟情不變。

另外，兩人今次喺大陸敍舊，噚日就有網民目睹兩人食麻辣火鍋，網民估計韓庚現時身在象山拍戲，而金在中就喺寧波，估計二人低調見面，金在中亦順道探韓庚班。